Virologu shqiptar Arban Domi, drejtuesi i Departamentit të Zhvillimit
të Vaksinave pranë kompanisë “Geovax” në Georgia të SHBA, duke
analizuar efektshmërinë e vaksinave kundër Covid-19, shprehu shqetësim
në lidhje me vaksinën kineze “Sinovac”, e cila sipas tij, siç dëshmojnë
studimet paraprake thuhet se ka një shkallë të ulët efikasiteti.
“Po e paragjykoj pa efekte sekondare, sigurinë po e lënë mënjanë sikur është e mirë. Problemi im personal është tek efikasiteti. Në rastin e Brazilit, që është testimi klinik më i pranueshëm në fushën tonë, është tek 50.38 % pas dy dozave dhe kjo lë për të dëshiruar. Me aq njohuri sa kam në mënyrë private nga kolegë të tjerë, por edhe nga njoftimet mediatike efikasiteti lë shumë për të dëshiruar dhe e fundit që është më shqetësuesja është deklarimi publik i njërit nga personat më të lartë të Agjencisë Kineze të Ndjekjes së Sëmundjeve. Në Shqipëri nuk është diskutuar shumë, por për mua është serioze”, theksoi ai në një intervistë me Euronews Albania.
Domi thekson se “Pfizer” ka dëshmuar efikasitet të lartë dhe sipas
tij lajm i mirë është se në Shqipëri bluzat e bardha janë vaksinuar me
“Pfizer”.
Sa i përket vaksinës “Sputnik V”, Domi thekson se vetë fakti që
rusët kanë zgjedhur ta dërgojnë vaksinën e tyre pranë EMA-s për
certifikim tregon se janë të bindur tek efektshmëria e saj.
“Sputnik, megjithëse nuk kemi parë dokumentacionin dhe nuk mund
të japë gjëra përfundimtare për të, por vetë fakti që prodhuesi rus e ka
dërguar tek EMA është një gjë pozitive dhe kjo tregon se ato kanë besim
tek vaksina e tyre”, tha ai.
